Contrat de mariage entre François Dumas et Marguerite Foy

Pardevant Gilles Rageot notaire Royal en la nouvelle france Et tesmoins Soubsignez furent present en leurs personnes Francois dumats demeurant en Ce dit pays fils de francois dumats Et d'anne Rollin Ses pere Et mere de Nanteuil en Vallee en Engoumois Evesché de poitier dune part ET Margueritte Foy fille de pierre foy Et de Catherine blanchard Ses pere Et mere de nermonort en poitou dautre pars, Lesquels en presence de Messire Alexandre de prouville Chevallier Seigneur de tracy Conseiller du Roy entouts Ses conseils Lieutenant general de Ses armez en toute la navigue tant parmer que par terre, de Messire daniel de Remy Chevallier Seigneur de Courcelle Conseiller du Roy en touts Ses Conseils Lieutenant general de sa Maiesté du canada Isle de terre neufve Et de lacadie, Et de Messire Jean talon Conseiller de sa Maiesté entouts ses Conseils et Intendant de Justice police Et financier de cedit pays, de dame Marie barbe de boulongne veuve de feu Messire Louis dailesboust vivant Chevalier Seigneur de Coulonges Et dargentenay Pr Lieutenant gnal pour Le Roy en Cedit payis de gabriel dumats oncle dud. futur Espoux de Jean poiré, de Marie Roy Jeanne Le ducq Et de Marc Giraud de Pierre Nolan Et de Charles Carrier de leurs bons grez et volontez reconnurent Et Confesserent avoir fait leur traitté promesse de mariage ainsy quil ensuit Cest a Scavoir que ledit dumats a promis et promet prendre la dit. Marguerite foy pour sa femme Et legitime Espouze, comme aussy lad. foy promet prendre led. francois dumats pour Son Mary Et legitime Espoux Icelluy Mariage faire Et solemniser en face de nostre Mere saincte Esglise Catholique apostolique Et Romaine le plustost que faire se pourra Et qu'il sera advisé Et deliberé Entr'eux Sy dieu Et nostre ditte Mere Ste Esglise y consentent Et accordent pour Estre les futurs conjoints uns Et Communs en touts biens meubles acquests Et conquests Immeubles du Jour des Espouzailles Suivant la Coutume de Paris / Ne seront tenus les futurs Conjoints aux debtes Lun de lautre faictes Et Crées avant leur futur Mariage [___] Sy aucunes y a Seront payéz Et acquittez par celuy de qui elles procederont Et Sur son bien Sera douée ladite future Espouze du douaire Coutumier, ou de la somme de deux cens Livres de douaire prefix pour une fois payer au choix de ladite future Espouze Icelluy douaire prendre Sur le plus Clair Et mieux apparroissant des biens dud. futur Espoux quil en a des a present asfectez Et hipotequez, et en cas quils ne susfisent seront pris Sur sa part des biens de la Communauté, A led. futur Espoux prits ladite future Espouze avec touts Ses droits noms raisons Et actions quelle a de pnt et qui luy pouront eschoir tant par successions donnations qu'autrement, Et a aussy ledit futur espoux declaré que ladite future Espouze A apporté et mis en Communauté de biens Jusques a la Somme de deux Cens livres Et arrivant mort dudit futur espoux ou de ladite future Espouze lesd. futurs conjoints Sont demeurez daccord que le Survivant des deux prendra par preciput avant partage Et hors part la somme de Cent livres

tournois, Ensemble Leurs habits bagues Et Joyaux servant chacun a leur usage Et arrivant dissolution dudit futur Mariage Sans Enfants procreez dicelluy lesd. futurs conjoints se sont faits Et font l'un deux a lautre donnation Irrevocable Entrevifs en la meilleure forme Et maniere que donnation puisse avoir lieu et Sortir a effet de toutes Et uns Chacuns Leur biens meubles acquests Et Conquests Immeubles qui Se trouveront Leur appartenir aujour du trepas du premier Mourant Sans aucunes en reserver n'y retenir, Et pour faire Insinuer les pres. partout ou Il [___] dans quatre mois d'huy suivant ordonnance lesd. futurs conjoints ont fait Et Constitué [___] leur porteur des pnets auql Ils ont donné pouvoir de den faire Et d'en requerir acte Car ainsy Etce promettant Etce obligeant chacun en droit soy Etce renoncant Etce Faict et passé A Quebec Le Cinquiesme Jour de Juillet Mil six cens soixante sept en presence de Claude de laserre Et de Jean baptiste gaudon tesmoins qui ont signé Et Ont lesd. futurs Espoux declaré ne Scavoir Escrire n'y Signer de ce requis Et Interpellez Suivant lordonnance avec lesd. gabriel dumats, girard, poirier, Roy, Leduc

Signatures de

prouville Tracy

Talon (avec paraphe)

Courcelle

M.B. De Boullongne

Gaudon (avec paraphe)

Claude Lasserre

p. nolan

Charles Carrier

Rageot (avec paraphe) notaire