1-Acte de concession d'une terre à François Dumas
par François de Laval 26 février 1669

Tous ceux qui ces Presentes Lettres verront François de la Val par la grace de dieu et du Saint Siege Evesque de Petrée Vicaire en apostolique en la Nouvelle france Nommé par le Roy premier Evesque de ce pays seigneur de beaupre et Isle dorleans Salut Scavoir faisans que pardevant Paul Vachon Notaire et procureur fiscal de ladite Isle dorleans et tesmoingts Soub Signez avoua Recognu et Confessé avoir donné et Conceddéé a tiltre de cens et Rentes Seigeurialles à Francois dumats maçon a ce present et acceptant le Nombre de trois arpants de terre de frond a prendre dans Ladite Isle dorleans du Costé du Sude tenant dUn costé à ___ garitou dit casquet daultre coste a Marc giraud pardevant Sur ledict fleuve parderriere Sur la Routte qui traverse ladite Isle de pointe en pointe a la charge audit Francois dumats de Sy establir y avoir feu et lieu ou autre pour luj dans Un an de ce Jour de Cultiver les terrres Et Continuer a Ladvenir aultrement La presente Concession Nulles Sans dommage et Interests ny mesme Restitution du travail quil pourait y avoir faict Soit pour bastir ou deserter Moyennant que ledict Francois dumats Sest obligé de pajer par chacun an au Jour et Fest de Sainct Martin Onzme Novembre par chasques arpent de terre de trois de frond Sur ledict fleuve la Somme de Vingt Sols tournois de Rentes foncieres et Non Rachestables douze deniers de cens pour chacun arpent de terre de frond et pour toutte ladite Concession trois Chappons Vifs ou trente Solzpour chasques Chappons au Choix du Seigneur le tout par chaqun an payable au lieu Seigneurialle du domaine de ladicte Seigneurie ou aultre lieu quil plaira audict Seigneur luj Indiquer a Commencer de payer les cens et Rentes dans la presente annéé et Continuer annuellement Et a tousjours lesdictes cens et Rentes portant lots et Ventes Saisines et Amande quand le quas y eschoira comme aussy delesser a Chasques costé Un chemain de quinze pied de large et auctant le long dudit fleuve et pour esviter a proces et Entretenir a Mitié Entre les tenants dudit lieu Sera Oblige de ce Clore Sy besoingts et faulte de quoy ne poura prestendre aucuns dommage et Interests des delicts que les bestiaux de ces Voisins auront faicts les pres le long du fleuve Seront Communs Sinon quil les poura faire faucher au prejudice de tous autrees Sera ledict Francois Dumats oblige de porter mouldre ces grains au Moulin Bannal de ladite Seigneurie Ne poura faucher que Sur et Un a Un la presente concession Sans le Consentement de ces Voisins et en quas de Vente ou a lienation Nous Nous Sommes Reserver le pouvoir de Retirer la presente Concession en Remboursant le prix frais et Loyaux Cousts pour Jouir de la presente concession par ledict Francois dumats luy ces hoirs et ayants Causes a tousjours plainement et paisiblement en faire et disposer touttes ainsy que bon luj Semblera Moyennant que ledict Francois dumats Sest oblige de Lesser Six perches de terre Sur Chasque arpens de terre de front apres en avoir Eu Lusufruit pendant quatre annéé pour estre en Communs avesq ces Voisins Car ainsy le tout a este accorde en foy de quoy Nous avons Signer la presente et a Icelle faict apposer le Cachet de Nos armes donne le Le vingt Sixiesme febvrier mil six cent Soixante Neuf en presence de Jean Cresste et Paul de Rainville tesmoingts

signatures de

Francois evesque de petrée

Yvan Creste (avec paraphe)

Pde rainville (avec paraphe)

PVachon (avec paraphe) procureur fiscal et notaire